Ferik Ida Mate Tanba Bee, Iha Kelikai
BAUKAU, STLTIMORLESTE.com – Inan ferik ida ho naran kompletu Filomena Morreira, idade 76, mate hafoin sai husi uma ba bee matan, iha area Aldeia Gugulai, Suku Uaitame, Postu Administrativu Kelikai, Munisipiu Baukau, hetan insidente iha dalan.
Pontu Vokal Autoridade Protesaun Sivil (APC) Baukau, Manuel Pereira esplika, iha loron 14 Julhu 2024 parte dader husi uma area Talobo’o atu ba hariis iha bee matan refere, maibe too iha dalan klaran konsege monu husi rai naruk too mate fatin.
Distansia husi uma ba bee matan refere kuaze lao kilometru 3 no distansia monu ba rai naruk kuaze metru 100, neebe rezulta vitima hetan kanek, tanba deskonfia vitima sama kois.
“Avo nee monu mate fatin kedas, roupa sira neebe hatais nomos avo nia isin kulit balun mos belit hotu iha fatuk sira, nia ruin tohar no ulun nakfera hotu,” informa Pontu Vokal Kelikai liu husi via WhatsApp, Kuarta (24/07/2024).
Nia fundamenta, vitima refere tinan naruk la asesu bee moos no bee hariis nian, tanba distansia entre bee matan ho uma hela fatin vitima dook, nunee vitima ba bee matan kada loron too loron refere hetan asidente.
“Entaun momentu nee nia oan feto ba vizita maibe too iha uma Avo Filomena laiha, nunee nia oan feto hein too tuku ida, maibe la mai nafatin,” nia konta.
Hafoin prosesu vitima nia oan feto buka tuir vitima Filomena Morreira la hetan, informa kedas ba Autoridade Suku no parte familia hodi buka, no konsege hetan vitima iha fatin asidente ho iis laiha ona.
Fontes ; https://stltimorleste.com/munisipiu/ferik-ida-mate-tanba-bee-iha-kelikai/
